你有冇試過，喺一個陌生嘅地方，突然懷念起「以前」嘅「自己」，我就係一個成日喺香港打波、流汗、鬧人、然後又笑返轉頭嗰個我。
嚟到英國之後，冬天漫長又沉悶，有時靜到連自己都認唔到。直到有一日，有個朋友 message「喂，不如出嚟打返波？」——嗰句說話，好似有人喺心入面開咗盞燈。
球場上嘅光
最初我哋只係幾個想郁下、散下悶氣。慢慢地，由幾個人變成幾十人，會出嚟練波，再到組隊比賽。我就係咁，成為 Manchester HongKongers Basketball Group 嘅一份子。
呢個社群成立四年，靠住「籃球」，一步步變成今日曼城香港人嘅運動社群。
我哋參加緊本地聯賽 MABL（Manchester Area Basketball League），亦曾經參加英格蘭港人籃球聯賽，曼城地區嘅私人聯賽，更加會係組入面搞聯賽鬥波。
講真，贏唔贏波唔係重點，最難得係每次比賽都有嗌：「好波！」、「傳波呀！」——嗰一刻，球場變咗時光機，將我哋帶返去香港，帶返去嗰種「團結、熱血、唔怕輸」嘅感覺。
今季，我哋開局五連勝。
但對我嚟講，最值得講唔係戰績，而係精神。
有人放工幾攰夜晚都嚟練波；有人帶埋細路坐喺場邊打氣；有人受傷後重新企番起身，就係為咗再一次聽到開波嗰聲哨子。
嗰份堅持，正正就係「香港人」嘅本意：你未必永遠贏，但你肯出現，就會堅持到黎明。
當籃球遇上音樂
今年，我啲隊友做咗一件連自己都估唔到嘅事——唱歌。
我哋同曼城嘅香港人樂隊 Gen03 合作，改編咗《男兒當入樽》嘅主題曲，由我哋自己重新填詞、錄音、主唱，最後誕生咗屬於 Manchester HongKongers 嘅：《照耀漆黑》。
填詞嘅朋友話：「我哋喺異鄉打波，就好似喺黑夜中搵光，所以想寫一首歌，留低我哋嘅故事。」
於是有咗嗰句——
「哪懼怕冷夜灰暗沒曙光，你共我照耀漆黑綻放。」
每次唱到呢句，我都覺得心入面好實在。
因為我真係喺最灰暗嘅時候，俾隊友、俾呢班人照亮。
隊歌入面仲有句歌詞話：
「懷著鬥志挫敗對手驅散，你我密契滿心間。」
呢幾句，講嘅唔止係籃球，而係生活。
喺異鄉，我哋面對唔同嘅工作文化、語言障礙、適應壓力。
有時你覺得「邊個明我」，但原來一首歌、一場波、一次笑聲，已經足夠令彼此明白——大家都係努力緊生活、努力緊唔好忘記自己。
下一代的延續
我哋仲有 Manchester HongKongers Jr.，間中同一班小朋友一齊打波。
有家長話，當佢哋聽到啲細路喺球場上大叫「傳波呀！」，嗰種熟悉嘅語氣，彷彿令佢哋瞬間回到香港。
原來運動唔止係競技，仲係文化同記憶嘅傳承。
有啲小朋友喺呢度識咗新朋友；有啲家長因為每星期一齊睇波，變成咗朋友。球場變咗社區中心——喺冷冷的曼城冬夜裡，充滿香港味嘅溫度。
堅持做喜歡的事
有人問我：「你哋唔係職業球隊，點解咁博？」
我笑住答：「因為我哋唔止打波，我哋係搵緊自己。」
呢個群組入面，有工程師、有護士、有學生、有全職爸爸。大家白天面對唔同壓力，但一到球場，就變返最真嗰個自己。有人帶飯盒嚟邊食邊睇；有人打完波幫手收器材；有人唔識打波都嚟傾吓偈、見吓朋友——呢啲都係畀到我哋嘅能量。
對我哋嚟講，運動係避風港，係一個「唔需要解釋」嘅地方。你可以講笑、可以用自己語言溝通、分享生活煩惱。球場上冇階級、冇年齡界線，只有共同嘅節奏。
追光，不只是勝負
「哪懼怕冷夜灰暗沒曙光，你共我照耀漆黑綻放。」
我哋唱嘅唔只係歌，係對生活嘅信念。
有人話移民生活充滿未知，但其實人生邊度冇未知？
只要你仍然有熱血、仍然肯試，就會有光。
無論你喺英國定喺香港，我都想邀請你——試下郁下身，做一樣你鍾意嘅事。
唔一定係籃球，可以係畫畫、跑步、寫字、唱歌。
唔駛等完美時機，因為追夢嘅起點，永遠都係「而家」。
每個人都係自己生命裡嘅「追光者」。
喺異鄉，喺球場，喺音符之間，我哋一齊流汗、一齊大笑，然後喺寒夜裡，一齊發光。
*****
《照耀漆黑》翻唱連結： 點擊收聽
Facebook： Manchester HongKongers
https://www.facebook.com/share/19khjZ2YC5
Instagram ：https://www.instagram.com/manchesterhkers…
作者：Andy
熱愛籃球的離散港人，現居曼城。平日返工、鍾意打波、更鍾意音樂。相信「只要你肯出現，就已經係光。」
